ლოგოს მეტაფორული გამოხატულება სახვით მოდალობაში

Abstract

ლოგო გამოიყენება ეფექტური მარკეტინგული გადაწყვეტილების მისაღებად. უფრო მეტიც, ამგვარი სასაქონლო ნიშანი განსაზღვრავს ბაზარზე პროდუქტის, კომპანიისა თუ მომსახურების განვითარებას. ბრენდის აღქმა მომხმარებლის, პარტნიორისა თუ ინვესტორის მიერ სახვითი და ვერბალური გამოხატულებით იწყება. მეტაფორიზაციის პროცესი კომერციულ დისკურსში ლოგოს ხელს უწყობს ისეთი დადებითი თვისებების გამოხატვაში, როგორიცაა: განვითარება, მოქნილობა, დინამიზმი და კომუნიკაბელურობა. ამგვარი მეტაფორული შტრიხი ყალიბდება ვერბალური და ვიზუალური თვისებების ურთიერთქმედებით. ადამიანისთვის ჩვეული მიზნებისა და სურვილების ჩანერგვით ლოგოში მივიღებთ ლოგოს გაპიროვნებას და ასეთ შემთხვევებში ძალიან ხშირად მოიაზრება მეტაფორული გამოხატულებები: ბრენდი ადამიანია/ brands are people ან ბრენდი ცოცხალი ორგანიზმია /Brands are living organisms. ამგვარი პროექტირებისთვის აუცილებელია ვერბალური წერილობითი ელემენტის შერწყმა ვიზუალურ ელემენტთან, რის შედეგად ვიღებთ სახვით სფეროში ინტეგრირებულ ვერბალურ სფეროს, საიდანაც გამომდინარეობს შემდეგი გამოხატულებები: Total -“საერთაშორისო თვალსაწიერი“, ბორჯღალოსანთა ლოგო-„მარადი განახლება, “Amazon.com, Inc-“გლობალურობა,საერთაშორისო თვალსაწიერი“, FedEx-„წინსვლა“, “Telianitrading“-საერთაშორისო წარმატება და ა. შ. გაპიროვნების მნიშვნელობის აუცილებლობა გამოწვეულია ბრენდის მიმართ ნდობის ფაქტორის ჩამოყალიბებით. ბრენდის გზავნილის გაპიროვნება ხელს უწყობს ბრენდის კონცეპტის კოგნიტურ დამუშავებას, სადაც აბსტრაქტული ნივთი ადამიანისთვის დამახასიათებელ თვისებებს იღებს, რის შედეგად იზრდება მისდამი ინტერესი და ნდობის ფაქტორი. ლოგო არ აიძულებს მომხმარებელს მის შინაარსში ჩაწვდომას, მისი ინტენცია მხოლოდ ბიზნესით დაინტერესებული პირებისადმი ერთგულების გაძლიერებისკენაა მიმართული.